Göngum í Hofsstaðaskóla
Hofsstaðaskóli tekur þátt í Göngum í skólann, en það verkefni hófst formlega 10. september og lýkur 8. október. Tekið var sérstaklega vel á móti nemendum 15. september, þann dag sem skólinn okkar tók beinan þátt í verkefninu. Boðið var upp á gulrætur í öllum anddyrum skólans og umferðaröryggi var aukið næst skólanum og uppi á gatnamótum ofan við skólann þar sem mesta umferðin er, en þar eru margir að renna í hlað bæði við FG og grunnskólann. Lögreglan hefur einnig verið sýnilegri í okkar nánasta umhverfi þessa dagana.
Kennarar leggja áherslu á að ræða við nemendur um umferðaröryggi á samgöngustígum og vísa í kort sem hanga uppi á veggjum ganganna. Kortin voru búin til fyrir þetta átak en á þeim má sjá hvar gangstéttar liggja, göngustígar og undirgöng/brýr. Kortið á að auðvelda börnum að sjá úr lofti hvaða leið er hentugust í og úr skólanum. Eins eru börnin beðin um að koma með ábendingar um það sem betur megi fara á þeirra leið í skólann. Þeim ábendingum verður svo komið upp á bæjarskrifstofu til frekari skoðunar.
Umsjónarkennarar skrá einnig upp á vegg í kennslustofunni með hvaða hætti börnin koma í skólann og er það gert dag hvern um tveggja vikna skeið (15.-26.september). Kennarar skólans eru einnig að vinna að ýmsum útfærslum á verkefninu Göngum í skólann og sýna meðfylgjandi myndir dæmi úr tveimur árgöngum.
Að átakinu loknu fá allir bekkir viðurkenningarskjal og hver og einn nemandi fær endurskinsmerki að gjöf.
