Nýtt smáforrit sem eflir lestur

Þriðjudaginn 12. janúar kom út nýtt smáforrit Study Cake sem hefur það að markmiði að efla börn dagsins í dag til þess að lesa. Forritið býður foreldrum upp á að verðlauna börn fyrir lestur. Börnin fá „heilasellur“ fyrir að leysa ákveðin mörg verkefni sem snúast um að lesa bækur og svara spurningum úr þeim og gefa álit á innihaldinu. Eftir að barnið safnar ákveðið mörgum heilasellum geta foreldrar verðlaunað börnin sín með einhverju ákveðnu og í leiðinni fá þeir betri yfirsýn yfir lesskilning barnanna sinna. Næstu sex mánuðina stendur til að semja spurningapakka fyrir 300 vinsælustu barnabækurnar á Íslandi sem notaðir verða í leiknum. Einnig er markmið fyrirtækisins að semja við þrjár stærstu bókaútgáfur landsins og Námsgagnastofnun. Hér má fræðast nánar um smáforritið Study Cake en það er hægt að sækja bæði í App store (ios) og Google Play (Android)

Læsi barna hefur verið mikið í umræðunni að undanförnu. Í ágúst var hrint af stað þjóðarátaki um læsi og til að sameina krafta allra við að auka lestrarhæfni barna hefur mennta- og menningarmálaráðuneyti í samvinnu við sveitarfélög, skóla og heimili unnið að gerð Þjóðarsáttmála um læsi. Þjóðarsáttmálinn er hvort tveggja í senn yfirlýsing og samningur við hvert sveitarfélag í landinu um sameiginlegan skilning á mikilvægi læsis og að unnið verði eftir fremsta megni að því marki að a.m.k. 90% nemenda í hverju sveitarfélagi geti lesið sér til gagns árið 2018.