Vetrarleyfi grunnskóla

Vikuna 22. - 26. febrúar er vetrarleyfi í grunnskólum Garðabæjar. Frístundaheimilið Regnboginn er opinn fyrir þau börn sem búið er að skrá. Skrifstofa Hofsstaðaskóla er lokuð þessa viku. 

Það sem af er vorönn hefur gengið mjög vel hér í Hofsstaðaskóla. Nemendur mættu í góðu jafnvægi úr jólaleyfi tilbúnir til þess að takast á við námið. Lítið hefur verið um veikindi nemenda og starfsmanna sem er fagnaðarefni. Öskudagurinn var með öðrum blæ en venja er hér í skólanum en tókst mjög vel og var hver árgangur með sína dagskrá. Skólinn bauð öllum upp á poppkorn sem vakti mikla lukku. Sjá má myndir og frétt um daginn hér á vefsíðu skólans.

Sóttvarnareglur og takmarkanir sem gilda um skólastarf eru í gildi út febrúar og við vitum ekki hvort þeim verður breytt eða haldið verður áfram með sama hætti. Við vonum auðvitað að við fáum að hafa heilan árgang saman t.d. í samveru á sal eða öðru. Starfsfólkið er enn í hólfun og fjarfundir eru orðnir okkur tamir. Við heyrum ekki annað en að almennt hafi forráðamenn verið ánægðir með rafræn nemenda- og foreldrasamtöl. Dæmi eru um að foreldrar sem hingað til hafa ekki getað mætt í samtölin vegna atvinnu sinnar hafi getað tekið þátt núna sem er ánægjulegt.

Úrtak foreldra fékk senda skoðanakönnun frá Skólapúlsinum fyrr í febrúar og er svörun komin í 68%. Betur má ef duga skal því þurfum að fá 80%. Vonandi tekst það á allra næstu dögum.

Eftir vetrarleyfið er komin marsmánuður og þá eru fjórar kennsluvikur fram að páskaleyfi. Í mars eru á dagskrá fjallaferðir í 4. – 7. bekk og svo er Stóra upplestrarkeppnin í 7. bekk haldin hér í Garðabæ 24. mars. Það er óðum að birta til og þessi mildi vetur er einstakur.

Við óskum ykkur góðrar helgar og ánægjulegs vetrarleyfis.

Stjórnendur og starfsfólk Hofsstaðaskóla.