Krakkarnir í 4. US taka í vetur þátt í etwinning verkefninu „The dog and the Turtle“ . Verkefnið hófst á Spáni n.t.t. í Ceip La Cala skólanum á Benidorm. Starfsmenn Hofsstaðaskóla heimsóttu nokkra skóla á svæðinu vorið 2010 og þar tók Unnur umsjónarkennari bekkjarins á móti tuskudýrunum tveimur „Hundinum og skjaldbökunni“ úr höndum Nieves í Ceip La Calla og kom með þau heim til Íslands. Tuskudýrin munu ferðast um Evrópu og taka þátt í leik og starfi nemenda á hverjum stað. Nemendur munu síðan fylgjast með ferðum tuskudýranna um Evrópu og læra um ný lönd. Sérstök áhersla verður lögð á að krakkarnir kynnist söngvum, hljóðfærum og leikjum í þeim löndum sem „Hundurinn og skjaldbakan heimsækja“ ásamt því að kynnast nemendum sjálfum og landinu þeirra. Þáttakendur í verkefninu eru á aldrinum 8-12 ára.
Hundurinn og skjaldbakan ætla að fylgja nemendum í 4. US eftir út septembermánuð. Unnur og krakkarnir ætla að vera duglegir að taka myndir, gera myndbönd og myndasýningar, skrifa fréttir og frásagnir. Á meðan tuskudýrin dvelja hér eru krakkarnir í hinum Evrópulöndunum duglegir að fylgjast með og fræðast um Ísland. Verkefnunum deilum við okkar á milli á "Twin Space" síðu í eTwinningumhverfinu. Þau lönd sem eru nú þegar skráð í verkefnið eru:
- Spánn
- Ísland
- Grikkland
- Ítalía
- Rúmenía
- Þýskaland
- Danmörk
- Finnland
- Pólland
- Holland
- Tyrkland
- Bretland
- Frakkland
Í endaðan september halda tuskudýrin héðan og dvelja í Grikklandi í október.
Hér er hægt að lesa nánar um verkefnið http://new-twinspace.etwinning.net/web/p30444/home