Troðfullt og góð stemming á bingói foreldrafélagsins

Laugardaginn 23. mars sl. hélt foreldrafélag Hofsstaðaskóla sitt árlega fjáröflunarbingó. Í ár var sú breyting gerð að bingóinu var tvískipt. Fyrri hluti var fyrir nemendur í 1. – 4 bekk og seinni hlutinn fyrir nemendur í 5. – 7. bekk. Breytingin mæltist vel fyrir og nutu báðir hópar sín mjög vel. Umsjón með bingóinu var í höndum stjórnar foreldrafélagsins og fjölmargir bekkjarfulltrúar komu og aðstoðuðu við undirbúning, framkvæmd og frágang.

Bingóstjóri var Gunnar Helgason rithöfundur og skemmtikraftur og fór hann á kostum. Í fyrri hlutanum var troðfullur salur af fólki og gríðarleg stemming. Í seinni hlutanum voru heldur færri mættir en stemmingin engu að síður frábær. Mikið safnaðist af fjölbreyttum vinningum og mörgum mjög veglegum enda lögðust allir á eitt í því að útvega vinninga. Í lok hvors hluta var þeim sem ekki höfðu fengið vinning boðið að koma upp á svið og velja sér glaðning þannig að allir fóru sáttir og sælir heim.

Myndin sem fylgir fréttinni er tekin af fésbókarsíðu foreldrafélags Hofsstaðaskóla. Þar má nálgast fleiri myndir frá viðburðinum.